ރައީސް ނަޝީދާ އެމްޑީޕީގެ ބާރުތައް ހަވާލުކޮށްފި

މިގަރާރު ފާސްކޮށް ބާރުތައް ރައީސް ނަޝީދާ ހަވާލު ކުރައްވާފައިވަނީ ގައުމީ ހިންގާ ކޮމެޓީގެ އިއްޔެގެ ބައްދަލުވުމުގައި ބައިވެރިވެވަޑައިގެންނެވި 28 މެންބަރުންގެ އިއްތިފާގުން ނެވެ.
މި ގަރާރުގައި ބުނެފައި ވަނީ ރިޔާސީ އިންތިޚާބްގެ ކެމްޕޭން ކުރެއްވުމުގައި އެވަގުތެއްގައި ކުރައްވަންޖެހި ވަޑައިގަންނަވާ އެންމެހާ ކަންތައްތައް ކުރެއްވުމަށް ކޮމިޓީތައް ރައީސަށް ހެއްދެވޭނެ ކަމަށެވެ.
އިއްޔެ ބައްދަލުވުމުގައިވަނީ އެޕާޓީގެ ފިޔަވަޅު އަޅާ ކޮމިޓީގެ ރިޔާސަތު ބެލެހެއްޓެވުމަށް ކޮމިޓީގައި މިހާރު ތިބި މީހުންގެ ތެރެއިން އެމެންބަރުން ކަނޑައަޅާ މީހަކު ރިޔާސަތު ބަލަހައްޓާ ގޮތަށް ފާސްކޮށްފައެވެ. މިކަން މިގޮތަށް ކުރާނީ ޕާޓީއަށް ނާއިބު ރައީސަކު އިންތިހާބު ކުރެވެންދެނެވެ. މިކޮމިޓީގެ ރިޔާސަތު ކުރިން ބަލަހައްޓަވަމުން ގެންދެވީ ޕާޓީގެ ކުރީގެ ނާއިބު ރައީސް ފޭދޫ ދާއިރާގެ މެންބަރު އަލްހާން ފަހުމީއެވެ. އޭނާ މިހާރުވަނީ އެމްޑީޕީ ދޫކޮށް އެހެންޕާޓީއަކަށް ބަދަލުވެފައެވެ.
އިއްޔެގެ ޖަލްސާގައި އިތުރަށް މަޝްވަރާކުރެވުނު ކަންތަކުގެ ތެރޭގައި ޕާޓީގެ މެމްބަރޝިޕްކަންތައް ހަރުދަނާކުރުމަށް ކުރެވޭނެ ކަންތަކާއި، ޕާޓީގެ ޙަރަކާތްތައް އަތޮޅޮތަކުގައި ފުޅާކުރުމާއި ޕާޓީގެ އޮފީހެއް ކޮލޮމްބޯ އަދި ޓްރިވެންޑްރަމްގައި ބެހެއްޓުން ހިމެނެއެވެ.
އެމް.ޑީ.ޕީގެ ޤައުމީ ހިންގާކޮމިޓީ އެކުލެވިގެންވަނީ ޕާޓީގެ ލީޑަރޝިޕްގެ އިތުރުން ޕާޓީގެ ކެބިނެޓް މެމްބަރުންނާއި ، ޕާޓީއަށްނިސްބަތްވާ ރައްޔިތުންމަޖިލީހުގެ މެމްބަރުންނާއި އަމީން ޢާއްމު އަދި އަމީންޢާއްމުގެ ނައިބު ގެ މައްޗަށެވެ.
ކޮންމެ އަންގާރަ ދުވަހަކު އެމްޑީޕީގެ ގައުމީ ހިންގާ ކޮމިޓީގެ ބައްދަލުވުމެއް ބޭއްވުމަށްވެސް އިއްޔެގެ ޖަލްސާގައިވަނީ 26 މެންބަރުންގެ ތާއީދާއެކު ފާސްކޮށްފައެވެ.